काठमाडौं — कमलपोखरीस्थित लोकप्रिय शानदार म:मको भवनमा भएको आगलागीमा घाइते भएका दुई जनाको मृत्यु भएको छ। कीर्तिपुरस्थित बर्न अस्पतालमा उपचाररत दुई जनाको निधन भएको जिल्ला प्रहरी परिसर काठमाडौंका एसपी अपिलराज बोहोराले पुष्टि गरेका छन्।
एसपी बोहोराका अनुसार सोमबार राति ९ बजे रविन राईको निधन भएको थियो भने मंगलबार राति २ बजे भीमबहादुर घलेको मृत्यु भएको हो।
माघ २३ गते शानदार म:ममा ग्यास लिक भएर भीषण आगलागी भएको थियो। उक्त आगलागीमा ११ जना कामदार घाइते भएका थिए। घाइतेमध्ये दुई जनाको मृत्यु भइसकेको छ भने अन्यको उपचार भइरहेको प्रहरीले जानकारी दिएको छ।
शानदार म:म काठमाडौंको अत्यधिक भीडभाड हुने र लोकप्रिय स्थानहरूमध्ये एक हो। यो घटनाले व्यवसायिक क्षेत्रका सुरक्षा मापदण्डप्रति गम्भीर ध्यानाकर्षण गराएको छ। प्रहरी र स्थानीय प्रशासनले आगलागीको कारणबारे थप अनुसन्धान गरिरहेको जनाएको छ।
